Нашето патување во светот на природата продолжи на живописниот остров Мадеира! Овој рај за љубителите на природата ни понуди незаборавни моменти и можност да го откриеме богатството на флората и уникатните градини кои го красат овој остров.
Мобилноста започна со официјално добредојде во Escola da APEL, каде што беше претставена агендата, а потоа имавме чест да ја проследиме извонредната презентација на тема ,,Лаурисилва – Унеско наследство”, каде што д-р Хуан Силва ни објасни зошто оваа шума е природно богатство на светот.
Но, авантурата навистина започна кога се искачивме со жичарницата кон Тропските градини на Палатата Монте. Тие беа магично место – зелени рајски катчиња полни со ретки и егзотични растенија. Прошетката низ овие градини ни го одзеде здивот, додека погледите кон Фуншал ни ја открија и културата и историјата на островот.
Северниот дел на островот ни ја откри мистичната шума Фанал, вистинско зеленило кое нè повлече во свет полн со свежина и мирис на природа.
Како сè ова да не беше доволно, нашето последно магично искуство беше пловењето до природниот резерват ,,Кабо Џирао”. Тука, драматичните карпи и тиркизното море ни ја покажаа суровата убавина на природата и нејзината величественост. А како врв на ова патување, имавме привилегија да ги видиме во нивното природно живеалиште – делфините и китовите, кои само го збогатија ова незаборавно искуство и ни го одзедоа здивот со својата грациозност.
Зошто ова беше важно?
Ова патување не беше само лекција за цвеќињата и природата, туку и за тоа колку е важно да ги зачуваме за идните генерации.
Како дополнителна инспирација за учениците, тие имаа уникатна можност да го посетат и музејот на Кристијано Роналдо, легендата на светскиот фудбал. Роден токму во Фуншал, Роналдо не е само симбол на спортски успех, туку и пример за истрајност, труд и посветеност. Неговата животна приказна, од скромни почетоци до глобална фудбалска икона, ги инспирира младите ширум светот, мотивирајќи ги да ги следат своите соништа и да се борат за успех без оглед на предизвиците. Посетата на музејот беше навистина посебен момент за сите нас, оставајќи ни силен впечаток и дополнителна доза мотивација.
Мадеира – место каде љубовта кон природата расте со секоја прошетка, а почитта кон планетата се продлабочува со секој нов пејзаж.















