Како дел од промотивните активности Гимназијата продолжува со организација на отворени денови.
На 27 март ги отворивме вратите за нашите гости – деветоодделенците од ООУ „Кочо Рацин“, кои присуствуваа на едукативен настан посветен на значењето и превенцијата на менталното здравје. Работилницата, реализирана под менторство на училишниот психолог, ја водеа ученичките од прва година: Љупка Бабачева, Сара Арсов и Мирјана Дејкоска.
Колку е важно да се грижиме за менталната хигиена, покрај секојдневната лична хигиена? Ова прашање беше во фокусот на активностите. Се потенцираше дека грижата за менталното здравје нема универзална формула – секој поединец пронаоѓа сопствени начини за воспоставување баланс, ослободување од негативните мисли и емоции и успешно справување со предизвиците на современото, динамично секојдневие.
Во рамки на посетата, гимназијалците ги прошетаа гостите низ училиштето, запознавајќи ги со кабинетите, училниците и нивните омилени катчиња, пренесувајќи ја автентичната атмосфера на гимназискиот живот.




