Отворен ден на Гимназијата: „Еволуција на трпезата во македонските села” со активот по географија

Во рамките на Отворениот ден на нашата Гимназија, учениците подготвија уникатна и креативна поставка со наслов „Еволуција на трпезата во македонските села“, преку која посетителите имаа можност да направат вистинско патување низ историјата, традицијата и секојдневниот живот на македонското село.

Поставката беше поделена во три историски периоди: до XV век, од XV до XX век и од почетокот на XX век до денес.

На првата трпеза беше претставена храната која била достапна пред доаѓањето на Османлиите и пред откривањето на Америка — период кога исхраната се темелела на локални житарици, млечни производи и традиционално подготвена храна.

Втората трпеза го долови периодот под Османлиска империја, кога во македонската кујна започнале да навлегуваат нови вкусови, зачини и намирници, збогатувајќи ја традиционалната трпеза.

Третата трпеза ја претстави современата исхрана — од почетокот на XX век до денес — покажувајќи како со текот на времето се менувале навиките, начинот на подготовка и разновидноста на храната во македонските села.

Особено внимание привлекоа и цртежите со наслов „Поглед низ прозорец“, преку кои учениците визуелно го прикажаа развојот на селото низ различни историски етапи: село од црковната фаза, село од феудалната фаза и современо македонско село.

Со оваа впечатлива изложба, учениците покажаа креативност, истражувачки дух и љубов кон македонската историја и традиција, претворајќи го минатото во жива приказна достапна за сите посетители.